ਸ਼੍ਰੋਮਣੀ ਅਕਾਲੀ ਦਲ ਦੇ ਸਾਬਕਾ ਸਰਪੰਚ ਦਲਬੀਰ ਸਿੰਘ ਢਿੱਲਵਾਂ ਦੇ ਘਤਲ ਨੂੰ ਲੈ ਕੇ ਸ਼੍ਰੋਮਣੀ ਅਕਾਲੀ ਦਲ ਦੇ ਪ੍ਰਧਾਨ ਸੁਖਬੀਰ ਸਿੰਘ ਬਾਦਲ ਅਤੇ ਬਿਕਰਮ ਸਿੰਘ ਮਜੀਠੀਆ ਸਮੁੱਚੀ ਪਾਰਟੀ ਸਮੇਤ ਇਸ ਵੇਲੇ ਕੈਬਨਿਟ ਮੰਤਰੀ ਸੁਖਜਿੰਦਰ ਸਿੰਘ ਰੰਧਾਵਾ ਦੇ ਪਿੱਛੇ ਹੱਥ ਧੋ ਕੇ ਪੈ ਗਏ ਦਿਖਾਈ ਦੇ ਰਹੇ ਹਨ ਤੇ ਅਕਾਲੀ ਆਗੂਆਂ ਦੀ ਕੋਸ਼ਿਸ਼ ਹੈ ਕਿ ਕਿਸੇ ਨਾ ਕਿਸੇ ਤਰਾਂ ਰੰਧਾਵਾ ਨੂੰ ਇਸ ਸਾਰੇ ਚੱਕਰ ਵਿੱਚ ਜ਼ਰੂਰ ਲਪੇਟਿਆ ਜਾਵੇ ਤੇ ਇਸ ਦਾ ਮੁੱਖ ਕਾਰਣ ਇਹ ਵੀ ਮੰਨਿਆ ਜਾ ਰਿਹਾ ਹੈ ਕਿ ਨਵਜੋਤ ਸਿੰਘ ਸਿੱਧੂ ਤੋਂ ਬਾਅਦ ਕਾਂਗਰਸ ਸਰਕਾਰ ਵਿੱਚ ਇਸ ਵੇਲੇ ਸਿਰਫ਼ ਤੇ ਸਿਰਫ਼ ਸੁਖਜਿੰਦਰ ਰੰਧਾਵਾ ਹੀ ਅਜਿਹੇ ਲੀਡਰ ਹਨ ਜੋ ਬਾਦਲ ਅਤੇ ਮਜੀਠੀਆ ਪਰਿਵਾਰ ਦੇ ਖ਼ਿਲਾਫ਼ ਡੱਟ ਕੇ ਬੋਲਦੇ ਹਨ ਤੇ ਸਬਕ ਸਿਖਾਉਣ ਦੀਆਂ ਧਮਕੀਆਂ ਵੀ ਦਿੰਦੇ ਹਨ।
ਪਿੱਛੇ ਜਿਹੇ ਤਾਂ ਰੰਧਾਵਾ ਨੇ ਮਜੀਠੀਆ ਨੂੰ ਜੇਲ੍ਹ ਵਿੱਚ ਡੱਕਣ ਦੀ ਗੱਲ ਵੀ ਕਹਿ ਦਿੱਤੀ ਸੀ। ਭਾਵੇਂ ਕਿ ਸਿੱਧੂ ਵੀ ਰੰਧਾਵਾ ਵਾਂਗ ਹੀ ਅਜਿਹੇ ਹਮਲਾਵਰ ਬਿਆਨ ਦਿੰਦੇ ਰਹੇ ਹਨ ਪਰ ਕਦੇ ਵੀ ਕੈਪਟਨ ਨੇ ਬਾਦਲਾਂ ਦੇ ਖ਼ਿਲਾਫ਼ ਕਾਰਵਾਈ ਕਰਨ ਦੀ ਗੱਲ ਨਹੀਂ ਕੀਤੀ ਤੇ ਨਾ ਹੀ ਅਜਿਹਾ ਹੁੰਦਾ ਹੀ ਦਿਖਾਈ ਦੇ ਰਿਹਾ ਹੈ। ਓਧਰ ਆਪਣੇ ਤੇ ਲੱਗੇ ਆਰੋਪਾਂ ਨੂੰ ਜਿੱਥੇ ਰੰਧਾਵਾ ਨੇ ਖਾਰਿਜ਼ ਕੀਤਾ ਸੀ ਉੱਥੇ ਮਜੀਠੀਆ ਨੂੰ ਘੈਂਗਸਟਰਾਂ ਦਾ ਸਰਗਣਾ ਤੱਕ ਐਲਾਨ ਦਿੱਤਾ ਸੀ। ਰੰਧਾਵਾ ਨੇ ਤਾਂ ਮਜੀਠੀਆ ਨੂੰ ਮਸ਼ੇ ਅਤੇ ਹੋਰ ਕਈ ਮੁੱਦਿਆਂ ਤੇ ਘੇਰ ਕੇ ਜਵਾਬ ਮੰਗਿਆ ਸੀ।
