ਇਸ ਦਰਮਿਆਨ ਦੋਵਾਂ ਦੇਸ਼ਾਂ ‘ਚ ਇਕ ਮਹੱਤਵਪੂਰਨ ਪਹਿਲੂ ‘ਤੇ ਰੁਕਾਵਟ ਪੈਦਾ ਹੋ ਗਈ ਹੈ। ਉਹ ਇਸ ਲਈ ਕਿਉਂਕਿ ਭਾਰਤ ਚਾਹੁੰਦਾ ਹੈ ਕਿ ਪਾਕਿਸਤਾਨ ਕਰਤਾਰਪੁਰ ਲਾਂਘੇ ਦੇ ਆਪਣੇ ਹਿੱਸੇ ‘ਚ ਪੈਂਦੇ ਕ੍ਰੀਕ ਖੇਤਰ ਅੰਦਰ ਰਾਵੀ ਦਰਿਆ ‘ਤੇ ਪੁਲ ਦਾ ਨਿਰਮਾਣ ਕਰੇ, ਜਦਕਿ ਪਾਕਿਸਤਾਨ ਇਸ ਤੋਂ ਇਨਕਾਰ ਕਰਦਿਆਂ ਦਰਿਆ ਅੰਦਰੋਂ ਹੀ ‘ਕਾਜਵੇ’ ਬਣਾਉਣ ਦੀਆਂ ਗੱਲਾਂ ਕਰ ਰਿਹਾ ਹੈ। ਇੱਥੇ ਹੀ ਆ ਕੇ ਫਸੇ ਇਸ ਪੇਚ ਨੂੰ ਕੱਢਣ ਲਈ ਦੋਵਾਂ ਦੇਸ਼ਾਂ ਦੇ ਅਧਿਕਾਰੀਆਂ ਦੀ ਅੱਜ ਵਾਹਗਾ ਬਾਰਡਰ ‘ਤੇ ਇੱਕ ਮਹੱਤਵਪੂਰਨ ਬੈਠਕ ਹੋਣ ਜਾ ਰਹੀ ਹੈ।
ਜਿਸ ਬਾਰੇ ਕਿਹਾ ਜਾ ਰਿਹਾ ਹੈ ਕਿ ਜੇਕਰ ਇਸ ਬੈਠਕ ‘ਚ ਇਸ ਮਸਲੇ ਦਾ ਕੋਈ ਸਾਰਥਕ ਹੱਲ ਨਾ ਨਿੱਕਲਿਆ ਤਾਂ ਲਾਂਘੇ ਦੀ ਉਸਾਰੀ ਦਾ ਕੰਮ ਮਿੱਥੇ ਗਏ ਸਮੇਂ ‘ਚ ਪੂਰਾ ਹੋਣਾ ਸੰਭਵ ਨਹੀਂ ਹੋਵੇਗਾ। ਦੱਸ ਦਈਏ ਕਿ ਭਾਰਤ ਦਾ ਇਹ ਤਰਕ ਹੈ ਕਿ ਜੇਕਰ ਰਾਵੀ ਦਰਿਆ ਅੰਦਰੋ ‘ਕਾਜਵੇ’ ਬਣਾਇਆ ਗਿਆ ਤਾਂ ਇਸ ਮਗਰੋਂ ਜੇਕਰ ਦਰਿਆ ਵਿੱਚ ਪਾਣੀ ਦਾ ਪੱਧਰ ਵਧਦਾ ਹੈ ਤਾਂ ਭਾਰਤ ਵਾਲੇ ਪਾਸੇ ਨਿਵਾਣ ਹੋਣ ਕਾਰਨ ਹੜ੍ਹਾਂ ਦੀ ਮਾਰ ਹਿੰਦੁਸਤਾਨ ਨੂੰ ਸਹਿਣੀ ਪਵੇਗੀ। ਜਿਸ ਲਈ ਕੇਂਦਰ ਸਰਕਾਰ ਬਿਲਕੁਲ ਤਿਆਰ ਨਹੀਂ ਹੈ।
ਦੂਜੇ ਪਾਸੇ ਪਾਕਿਸਤਾਨ ਸਰਕਾਰ ਦਰਿਆ ਉੱਤੇ ਇਕ ਕਿਲੋਮੀਟਰ ਲੰਬਾ ਪੁਲ ਬਣਾਉਣ ਦੇ ਪੱਖ ‘ਚ ਇਸ ਲਈ ਨਹੀਂ ਕਿਉਂਕਿ ਜੇਕਰ ਭਵਿੱਖ ਵਿੱਚ ਕਦੇ ਭਾਰਤ ਨਾਲ ਪਾਕਿਸਤਾਨ ਦੇ ਜੰਗ ਵਰਗੇ ਹਾਲਾਤ ਪੈਦਾ ਹੁੰਦੇ ਹਨ ਤਾਂ ‘ਕਾਜਵੇ’ ਨੂੰ ਹਟਾਉਣਾ ਉਨ੍ਹਾਂ ਲਈ ਸੌਖਾ ਹੋਵੇਗਾ ਜਦਕਿ ਪੁਲ ਉਨ੍ਹਾਂ ਹਾਲਾਤਾਂ ਵਿੱਚ ਪਾਕਿਸਤਾਨੀ ਫੌਜ ਲਈ ਵੱਡੀ ਸਿਰਦਰਦੀ ਬਣੇਗਾ। ਸੂਤਰਾਂ ਦੇ ਹਵਾਲੇ ਨਾਲ ਕੁਝ ਅਪੁੱਸ਼ਟ ਖ਼ਬਰਾਂ ਇਹ ਵੀ ਆਈਆਂ ਹਨ ਕਿ ਇੱਧਰ ਭਾਰਤ ਵਾਲੇ ਪਾਸੇ ਕੁਝ ਲੋਕ ਇਹ ਵੀ ਚਾਹੁੰਦੇ ਹਨ ਕਿ ਇਸ ਲਾਂਘੇ ਅੰਦਰ ਪੁਲ ਅਤੇ ਸੜਕਾਂ ਵਿੱਚ ਕੁਝ ਅਜਿਹੇ ਬੰਬ ਫਿੱਟ ਕੀਤੇ ਜਾਣ ਜਿਹੜੇ ਕਿ ਜੰਗ ਦੇ ਹਾਲਾਤਾਂ ਵਿੱਚ ਰਿਮੋਟ ਦਾ ਇੱਕ ਬਟਨ ਦੱਬਣ ‘ਤੇ ਇਸ ਲਾਂਘੇ ਨੂੰ ਉਡਾ ਕੇ ਹਿੰਦੁਸਤਾਨ ਨੂੰ ਦੁਸ਼ਮਣ ਤੋਂ ਸੁਰੱਖਿਅਤ ਕਰ ਸਕਣ।