ਅੰਤਿਮ ਯਾਤਰਾ ਦੀ ਰਵਾਨੀ ਮੌਕੇ ਲੋਕਾਂ ਦੀ ਭਰਵੀਂ ਭੀੜ ਕਰਕੇ ਰਿਹਾਇਸ਼ ਦੇ ਗੇਟ ‘ਤੇ ਪੁਲੀਸ ਦੇ ਬੇਰੀਕੇਡ ਵੀ ਉੱਖੜ ਗਏ। ਇਸ ਮੌਕੇ ਪਿੰਡ ਵਾਸੀਆਂ ਖਾਸਕਰ ਨੌਜਵਾਨਾਂ ਨੇ ਅੰਤਿਮ ਯਾਤਰਾ ਵਿੱਚ ‘ਬਾਦਲ ਤੇਰੀ ਸੋਚ ‘ਤੇ ਪਹਿਰਾ ਦਿਆਂਗੇ ਠੋਕ ਕੇ, ਅਤੇ ਬਾਦਲ ਅਮਰ ਰਹੇ ਦੇ ਨਾਅਰੇ ਲਗਾਏ। ਅੱਜ ਸਮੁੱਚੇ ਪਿੰਡ ਵਾਸੀਆਂ ਨੇ ਉਨ੍ਹਾਂ ਨੂੰ ਭਾਵ-ਭਿੰਨੀ ਸ਼ਰਧਾਂਜਲੀਆਂ ਦੇ ਕੇ ਆਪਣਾ ਸਤਿਕਾਰ ਜਤਾਇਆ। ਇਸ ਮੌਕੇ ਸਕੂਲਾਂ, ਕਾਲਜਾਂ ਅਤੇ ਆਈਟੀਆਈ ਦਾ ਸਟਾਫ਼ ਵੀ ਅੰਤਿਮ ਯਾਤਰਾ ਦਾ ਹਿੱਸਾ ਬਣਿਆ। ਪਿੰਡ ਵਾਸੀ ਗੁਰਮੀਤ ਸਿੰਘ ਆਈਟੀਆਈ ਨੇ ਕਿਹਾ ਕਿ ਬਾਦਲ ਸਾਬ੍ਹ ਪਿੰਡ ਦੇ ਹਰੇਕ ਵਿਅਕਤੀ ਨੂੰ ਆਪਣਾ ਪਰਿਵਾਰ ਮੰਨਦੇ ਸਨ। ਉਨ੍ਹਾਂ ਕਿਹਾ ਕਿ ਦੇਸ਼ ਦੇ ਕੌਮੀ ਪੱਧਰ ਦੇ ਆਗੂਆਂ ਨੇ ਪੁੱਜ ਕੇ ਬਾਦਲ ਸਾਬ੍ਹ ਦੀ ਵੱਡੀ ਸ਼ਖ਼ਸੀਅਤ ਨੂੰ ਸਿਜਦਾ ਕੀਤਾ। ਇਸ ਸਮੁੱਚੇ ਪਿੰਡ ਲਈ ਇਤਿਹਾਸਕ ਅਤੇ ਬੜੇ ਮਾਣ ਵਾਲੀ ਗੱਲ ਹੈ।